Nadakpan nga lider sang NPA-Maria Concepcion Araneta-Bocala, wala ginakilala sang Government Peace Panel nga consultant sang NDFP

Iloilo City–(Update) Wala ginakilala sang Government Peace Panel nga consultant sang National Democratic Front of the Philippines (NDFP) sa Visayas si Maria Concepcion Araneta-Bocala, ang pinakamataas nga lider sang New People’s Army sa Panay.

Suno kay Ms. Jurgette Honcullada, isa sa mga miembro sang GPP, bisan may gina-uyatan nga identification kag travel document si Bocala sa idalum sang pangalan nga Remi Estrella, indi siya protektado sang Joint Agreement on Safety and Immunity Guarantees (JASIG).     Natukiban suno sa iya sang GPP sang 2011 nga wala sang litrato ang data nga ginsumiter sang NDFP angut kay Estrella rason nga indi sila makapat-od kon ini man si Bocala. Bangud sini, makabig ni Honcullada nga valid ang pag-aresto kay Bocala sang Sabado.

Natingala si Honcullada kon nga-a ginabangil ni Bocala ang JASIG sa pag-aresto sa iya bisan wala man sang nagapadayon nga peace talks. Operative lang suno sa iya ang JASIG sa duration sang peace talks sa tunga sang gobyerno kag NDFP. (Aine Grace Bravo)