Father Marco Sulayao sang Iglesia Filipina Independiente, ginpahayag nga nakabaton sang pamahug sa kabuhi

Iloilo City–Ginkumpirmar ni Mr. Reylan Vergara, spokesperson sang Karapatan Panay, nga nakabaton sang pamahog sa kabuhi si Father Marco Sulayao sang Iglesia Filipina Independiente.

Gintumod ni Vergara ang insidente sang Setyembre 1 sa diin may nagkadtu sa simbahan ni Sulayao kag ginapangita ini. Magluwas pa ini sa natabu sang nagligad nga bulan sa diin duha ka lalaki nga nagasakay sa motorsiklo ang nagkadtu sa balay ni Sulayao.

Nagapati si Vergara nga tuyo lang sang mga nagapamahog nga pahipuson si Sulayao bangud isa ini sa mga maisog nga nagapakigbato sa kinamatarong sang mga pigado nga pumuluyo ilabe na sa mga biktima sang supertyphoon Yolanda sa probinsya. Ginakabig sang grupo nga harassment ang mga pagpamahog sa pari. (Aine Grace Bravo)