Resolution ni Councilor Joshua Alim nga nagakondenar sa tuyo nga pagsaka sang armado nga kalalakihan sa estasyunan sang Aksyon Radyo, gin-aprobahan sang konseho

Iloilo City — Gin-aprobahan sang city council ang resolution ni Councilor Joshua Alim nga nagakondenar sa tuyo nga pagsaka sang armado nga kalalakihan sa estasyunan sang Aksyon Radyo Iloilo sang Nobyembre 19 sang kaagahon.

Wala na ginakilala suno kay Alim sang mga armado nga kalalakihan ang kasuguan  kag press freedom sang mga katapo sang media.

Normal lang suno kay Alim nga may makomentar ang mga anchorman kag kon indi kontento ang subject sa issue, may korte man nga agud mapasakaan sang kaso nga libel kag indi dapat pag-ipaagi sa makahas nga tikang.

Magluwas sa tuyo nga pagsaka sang armado nga kalalakihan sa estasyunan, ginpahanumdom man ni Alim nga wala gihapon nahatagan sang hustisya ang pamilya sang 32 ka mga journalists nga ginpamatay sa Maguindanao Massacre, 6 ka tuig na ang nakaligad.

Wala naman ginatolerar ni Councilor Armand Parcon ang mga kalakasan nga ginahimo sa mga sibilyan ilabe na sa mga katapo sang media. (JoMaque)