Security plans para sa kafiestahan sa Jaro, naplastar na sang ICPO

Iloilo City — All-set na ang Iloilo City Police Office sa security plans agud masiguro nga safe ang kafiestahan sang Jaro sa Pebrero 2.

Suno kay Inspector Shella Mae Sangrines, spokesperson sang ICPO, nga nagtsekyar sila kahapon sa sulod kag palibot sang Jaro plaza kaupod kay ICPO OIC Kashmir Disomangcop.

Nagpadala man si Police Regional Office 6 Director Bernardo Diaz sang team agud magpanguna sa inspection.

Magaserbe nga ground commander sa bilog nga adlaw nga kahiwatan si Chief Inspector Herbert Ballego, hepe sang Jaro PNP.

Magatutok suno kay Sangrines ang mga pulis sa petty crimes pareho sang pagpangawat, pickpockets kag blade slashing.

Nagalaum si Sangrines nga mahagan-hagan ang gintumod nga mga krimen sa pagpalapta sang madamo nga pulis sa Jaro area. (JoMaque)