Mag-amay nga Pulis sa Mandurriao nga Nag-imbitar sang Wanted person sa Bunyag, Magapangatubang sang Kaso administratibo

Iloilo City — May probable cause agud pasakaan sang kaso administratibo ang mag-amay nga pulis sa Mandurriao nga nag-imbitar sang wanted person nga si Arian Oribe sa bunyag.

Suno kay Police Regional Office 6 Public Information Officer Gilbert Gorero, pakatapos nga nasumiter ni ICPO Director Remus Zacharias Canieso sang report sa natabu, na-establisar nga may probable case nga kasuhan sang administratibo sanday PO3 Arnie Luminario kag iya bata nga PO1 Arnie Luminario Jr.

Ang mag-amay lang sa 14 ka pulis nga nagtambung sa bunyag ang ginrekomendar nga ipa-idalum sa pre-charge evaluation sang Regional Investigation and Detective Management Division.

Nadalahig man si Chief Inspector Rio Maymay nga hepe sang Police Station 1 sa imbestigasyon bangud nga nagtambung man ini sa bunyag bilang maninoy sang bata ni PO1 Luminario Jr.

Pero gin-athag ni Maymay nga wala niya natalupangdan sa venue si Oribe kag nakita na lang nga ginaposasan sa guwa sang nagpauli na siya. (JoMaque)