UPDATE: Legal Division sang PRO-6, Nagapreparar na sang mga Kaso Batuk sa mga Barangay Officials sang Monica-Blumentritt, City Proper nga Wala Nagpirma sa Inventory sa Balay ni former Barangay Kagawad Jesus Espinosa Jr

Iloilo City–Gina-preparar na sang legal division sang Police Regional Office 6 ang kaso administratibo nga ipasaka batuk sa mga barangay officials sang Monica-Blumentritt, City Proper.

Kasunod ini sang ila pagbalibad nga magpirma sa inventory sa ginhimo nga raid sang Regional Anti-Illegal Drug Special Operations Task Group ukon RAIDSOG sa balay sang mag-asawa nga Punong Barangay Keith ‘Dabing’ Espinosa kag former Barangay Kagawad Jesus ‘Jingjing’ Espinosa sang Domingo. Ini bisan pa nga kaupod man ang sanday Kapitan Espinosa kag mga Barangay Kagawad nga sanday Arturo Atinado kag Amadeo Atinado samtang gina-search sang RAIDSOG ang balay.

Suno sa PRO-6, hatagan nila sang leksyon ang mga ini agud nga indi na masulit sa masunod nga anti-drug operations sang mga pulis. Na-recover sa balay sang mga Espinosa ang pito ka sachets sang suspected shabu, pusil ni Jingjing Espinosa nga expired na ang lisensya kag cash. (AGB)