Sustainable Livelihood Program sang DSWD para sa mga Biktima sang Super Typhoon Yolanda sa Isla sang Panay, Nagapadayon 3 ka Tuig matapos Naglaslas ang Bagyo

Iloilo City — Masobra sa 8 ka bilyon ka pesos ang gin-release sang gobierno para sa mga biktima sang Super Typhoon Yolanda nga naglaslas sang Nobyembre 8, 2013 sa Isla sang Panay.

Gin-athag ni Department of Social Welfare and Development (DSWD 6) Administrative Officer Leo Quintilla nga halos tanan nga apektado sang bagyo ang naka-benipisyo kasubong sang pagkaayo sang ila naguba nga mga balay, pagkaayo sang karsada kag mga eskuwelahan.

Bisan3 na ka tuig ang nakaligad nga naglaslas ang Super Typhoon Yolanda, padayon suno kay Quintilla ang sustainable livelihood program sang ahensya para sa mga biktima sang bagyo.

“Wala balay”

Nag-martsa naman ang Bayan Panay upod ang 500 ka mga Yolanda victims sa dalanon sa Estancia.

Suno kay Bayan Panay coordinator Wilson Balinguit, madamu pa sang mga biktima sang bagyo nga nadulaan sang puluy-an ang tubtub subong, wala pa nahatagan sang gobierno sang ila ilistaran.

Tatlo na ka tuig ang nakaligad suno kay Balinguit apang wala pa nakasaylo ang mga biktima sa balay nga ginpatindog sang National Housing Authority sa Barangay Calatdan, Estancia.

Wala man nahatagan sang palangabuhian ang mga mangingisda nga apektado sang oil spill.  (JoMaque)