Subong nga tuig nga tema sang National Children’s Month, nagasuporta sa war on drugs sang gobierno

Iloilo City — Suporta sa war on drugs sang gobierno ang tema sang subong nga tuig nga National Children’s Month nga Bata: Iligtas sa Droga. Suno kay Miss Raj Alvarado, focal person sang DSWD sub-committee to the Welfare and Children, katuyuan sini nga mapa-intiendi ang kabataan sa halit sang illegal nga druga kag mapamatian ang ila opinyon sa amu nga problema. Base sa record sang Philippine National Police, naglab-ot sa 548 ka mga menor de edad sa Rehiyon 6 ang nagsurrender sa Oplan Tokhang. Nagapati ang DSWD suno kay Alvarado nga biktima lang sang sirkumstansya ang kabataan rason sang pag-involve nla sa amu nga bisyo kag nagkalain-lain nga krimen. Ini ang rason kun ngaa naghimo sang programa ang ahensya para malikaw ang kabataan sa mga malain nga impluwensya pareho sang illegal nga druga.  Nalakip sa programa ang counseling session, nagkalain-lain nga aktibidad kag mga children organization sa diin puwede maka-intra ang mga pamatan-on. Magatakop ang National Children’s Month sa Disyembre 12, 2017. (JoMaque)