Kamatayon sang 15-anyos nga dalagita nga nasapwan sa sapa sa Dingle nga wala na sang underwear, posible may foul play

Iloilo — May posibilidad nga may foul play sa kamatayon sang 15-anyos nga dalagita nga nasapwan nga naga-utaw utaw sa sapa sa Sitio Nabaho, Brgy. Camambugan, Dingle sang Nobyembre 11. Ini ang ginpahayag ni Dr. Owen Libaquin, medico legal officer sang Police Regional Office 6 matapos gin-autopsy ang bangkay sang dalagita nga ginkilala kay Lea Rapista sang amo man nga barangay.

Suno kay Libaquin, indi na matumod ang gintunaan sang kamatayon ni Rapista bangud yara ini sa advance state of decomposition sang nasapwan. Indi man mahibaluan kun ginhimuslan ang dalagita. Apang may nakita nga injury sa wala nga parte sang ulo kag leog sang dalagita suno kay Libaquin nga posible ginlampusan sang matig-a nga butang. Posible man suno sa iya nga ginlampos ang ulo ni Rapista.

Nagapadayon ang imbestigasyon sang Dingle police sa kamatayon sang dalagita. Oktubre 29 sang naglakat si Rapista dala ang binangon kag ginunting agud manguha sang tambo apang wala na nakapauli. May deperensya sa paminsaron ang dalagita suno sa iya pamilya. (JoMaque)