Father Esperidion “Boy” Celis, nag-athag nga wala siya nagabatu sa mandu ni Jaro Archbishop Angel Lagdameo nga pagsaylo niya sa Barotac Nuevo Parish

Iloilo City —  Wala nagabato si Father Esperidion “Boy” Celis sa mandu ni Jaro Archbishop Angel Lagdameo nga pagsaylo sa ya sa Saint Anthony Parish Church sa Barotac Nuevo halin sa Saint Anne Parish Church sa Molo.  Pag-athag ini ni Father Celis sa press conference sa Iloilo Convention Center nga iya ginpatawag upod sa pila sini ka parokyano. Ginpa-athag ni Celis nga ginahatagan niya lang sang pagtamod ang pakitluoy sang iya mga parishioners nga magpabilin siya sa Molo. Ginpahayag ni Celis nga gin-istorya niya ang arsobispo nga magapabilin siya sa St. Anne Parish antes ang iya bag-o nga assigment pero ginhambalan siya nga dal-on ang iya request sa Roma. Ginabilin na ni Celis ang desisyon sa mga cardinals kag archbishop judges kag nagpasalig nga sundon ini.  Mangin epektibu sa Disyembre 3 ang bag-o nga assignment sang mga pari sa idalum sang Jaro Archdiocese.

Nagsunod sa Canon Law

Ginsunod ni Father Esperidion “Boy” Celis ang Canon Law sa iya pagdiretso sa Roma agud hingyuon nga ipabilin siya sa St. Anne Parish Church sa Molo. Base sa Canon Law suno kay Celis, mahimo maka-apelar sa Roma kon agrabyado ang pari sa ginpapanaug nga mandu sang iya superior. May laye man ang simbahan suno sa iya sa pagsaylo sang pari sa iban nga parokya.  Nagpatawag si Celis sang press conference kahapon agud ipa-athag nga wala siya nagakontra sa order ni Archbishop Angel Lagdameo nga magsaylo sa Saint Anthony Parish Church sa Barotac Nuevo.  Ginrason ni Celis nga gina-ulikdan niya lang ang iya mga parokyano nga suno sa iya, naghingyo nga indi sila pagbayaan. Ginpabutyag man sini nga luyag niya tapuson ang mga programa nga iya ginsuguran. Epektibu sa Disyembre 3 ang reshuffling sang mga pari sa idalum sang Jaro Archdiocese. (JoMaque)