Pagdumdom sa 161st birth anniversary sang Ilonggo nga baganihan, Graciano Lopez Jaena, ginpangunahan ni Mayor Joe Espinosa

Iloilo City–Ginpangunahan ni Mayor Joe Espinosa ang pagdumdom sa ika-161 nga kaadlawan sang Ilonggo nga baganihan nga si Graciano Lopez Jaena sa Jaro Plaza kaina sang aga.

Sa iya nga speech, ginpabutyag sang alkalde nga dapat saulugon kag dumdumon ang pagkabaganihan ni Lopez Jaena ilabe na ang mga importante sini nga hinimuan agud mabatuan ang pagpamigos sang mga Katsila. Suno kay Mayor Espinosa, si Lopez Jaena ang pinakamakalulu-oy nga national hero sang Pilipinas bangud tubtub subong, wala napauli ang bangkay sini matapos nga napatay sa Espanya bangud sa tuberculosis. Indi ma-locate suno sa iya ang bangkay ni Lopez Jaena bangud wala sang pangalan ang iya lulubngan.

Gin-ayo man ni Espinosa nga ang city government na ang magapreparar sang selebrasyon sang Graciano Lopez Jaena Day bilang pagpakita sang ka-importante sang Ilonggo nga baganihan. Plano sini nga himuon nga major event ang selebrasyon kapareho sang Independence Day kag Rizal Day. (AGB)