Pila ka UPV students, maupod gihapon sa mga street protests

Iloilo City–Maupod gihapon sa street protest ang pila ka estudyante sang University of the Philippines-Visayas bisan nagpamahog si Presidente Rodrigo Duterte nga i-kickout sila sa unibersidad kag pasudlan sang mga Lumad ang eskuwelahan.

Kasunod ini sang pag-walkout sang mga estudyante sang UP Diliman sa ila klase kag nagprotesta batuk sa mga polisa sang administrasyon.

Suno kay Ms. Therese Arianne Samson, Presidente sang Student Council sa UPV,  ang pag-walkout sang mga estudyante panugod pa lang sa mas daku nga protest rally sa Pebrero 23 upod ang iban nga estudyante sang nagkalain-lain nga unibersidad sa bilog nga pungsod. Nagapakita lang ini suno sa iya nga wala nagahipos ang mga estudyante sa sala nga gina-obra sang administrasyon.

Nagapati si Samson nga mas daku ang matun-an sang mga student protesters sa dalan sang sa sulod sang eskuwelahan.

Wala man ini nanugon sa isa ka adlaw nga absent kon ang ginapakigbato ang kinamatarong sang mga pumuluyo. (AGB)