Operator sang STL Province nga si Mr. Sam Aguilar, gintiro sa Tigbauan; Aguilar, nagapabilin sa ospital

Tigbauan, Iloilo–Pilason ang operator sang Small Town Lottery sa probinsya sang gintiro sa Barangay Buyuan, Tigbauan pasado alas-11 kaina sang aga.

Suno kay alyas May nga isa sa mga nakakita sa natabu, nagapondo sa likod sang Ceres bus ang Toyota Grandia nga ginasakyan ni Mr. Sam Aguilar bangud sang pagpugok sang trapiko sa taytay. Nakita ni May nga nagpanaug sa nagadulog nga motorsiklo ang backrider, ginpalapitan ang van kag gintiro.

Nagtinguha naman ang driver nga makalusot sa iban nga salakyan kag gindala sa The Medical City sa Molo si Aguilar nga may mga pilas sa wala nga kilid kag likod. Padayon nga ginabulong sa ospital si Aguilar.

Samtang ginpahayag ni May nga nagpalagyo pakadto sa Guimbal ang mga suspek. May tabon sa nawong ang gunman suno kay May kag ginpahayag nga gamit sini sa pagtiro ang malaba nga pusil.

Magluwas sa Toyota Grandia nga ginsakyan ni Aguilar nga buka ang wala nga bintana sang passenger seat kag may igo sang bala sa windshield, wala nga kilid kag buka ang bintana sa likod, nasalabat man ang Mitsubishi Adventure nga ginamaneho ni Glicerio Geamal Jr, 41-anyos sang Barangay Nahapay, Guimbal nga may igo sa windshield, bumper kag hood apang wala sang iban nga nasamaran.

“Padayon ang imbestigasyon”

Wala pa nakilala sang Tigbauan police ang mga suspek nga nagtiro kay Aguilar. Suno kay Senior Inspector Hermogenes Eulatic, hepe sang Tigbauan Police Station, padayon ang ila imbestigasyon sa identity sang riding-in-tandem. Gina-check man sang police ang kuha sang mga CCTV cameras sa mga lugar nga posible nalabayan sang mga suspek.

Apat ka empty shells nga compatible sa M16 kag duha ka deformed slug ng compatible sa 45 caliber ang narecover sang mga pulis sa crime scene. (AGB)