DOT 6, ginpabilin ang 5.5 million tourist arrival target subong nga tuig bisan siraduhan ang Boracay

DOT 6 office, Iloilo City–Ginapanan-aw ni Department of Tourism Region 6 Director Helen Catalbas nga masobra isa ka milyon ka mga turista sa Western Visayas ang madula sa anum ka bulan nga pagsirado sang Boracay.

Apang wala siya sang plano nga buhinan ang tourist arrival target sang ahensya subong nga tuig. Ini ang rason suno sa iya nga ginapreparar niya ang mga probinsya sa Western Visayas nga may mga tourist destinations para sa pagsalu sang mga turista halin sa Boracay. Daku nga kawad-an sa Western Visayas kon makadtu lang sa iban nga rehiyon ukon sa iban nga pungsod ang mga turista nga madisplace sa Boracay.

Lakip sa pagpanghanda sang DOT suno kay Catalbas ang pagbutang sang tourism personnel sa tanan nga airports sa Region 6 agud magpanagtag sang travel information materials pakadtu sa nagkalain-lain nga probinsya kag syudad sa rehiyon.

Target gihapon sang DOT nga malab-ot ang 5.5 million tourist arrival sa Western Visayas subong nga tuig sa pihak sang natalana nga pagsirado sang Boracay para sa rehabilitasyon. (AGB)