Mga religious sector kag cause-oriented groups sa Iloilo, nagtingub sa protest rally angut sa pagdumdom sang ika-46 nga deklarasyon sang Martial Law sa pungsod subong nga adlaw

Iloilo City–Nagtingub ang religious kag cause-oriented groups sa ecumenical prayer rally kaina sang hapon, Setyembre 21, kadungan sang ika-46 nga anibersaryo sang deklarasyon sang martial law sa pungsod.

Ginangunahan sang Simbahan Katoliko ang prayer rally sa pagpamuno ni Bishop Emeritus Angel Lagdameo.

Ginpahayag ni Monsignor Meliton Oso nga sa prayer rally, ila ginpabati ang mga sentimiento sa gobyerno ilabe na sa mga kaso sang pagpamatay. Sa ila record, naglab-ut na sa 27, 058 ang patay sa war on drugs kag political killings sa idalum sang Duterte administration. Gin-engganyo ni Oso ang pumuluyo nga magguwa kag indi magkahadlok sa pagpabati sang ila hibubun-ot.

Ginakabig naman ni Oso ang nagakatabu subong nga undeclared martial law.

‘Protest rally’

Nagmartsa palibot sa City Proper area ang mga cause-oriented groups sa pagpanguna sang United People’s Action Against Dictatorship.

Suno kay Mr. Elmer Forro, secretary general sang Bagong Alyansang Makabayan, protest rally ang ila ginhimo kag kabahin lang sa mga aktibidad ang ecumenical prayer rally. Nagbitbit ang mga raliyesta sang mga placards kag effigy ni Presidente Rodrigo Duterte kag anay Presidente Ferdinand Marcos sa ila pagmartsa.

Nagpa-athag si Forro nga naghimo sila sang protest rally bangud sa mga nagakatabu nga pagpamatay sa war on drugs, political killings, graft and corruption kag pagmahal sang mga balaklon. (AGB)