(UPDATE) Lemery police, may persons of interest na sa nagtiro patay sa barbero kag tatlo ka tuig nga bata sini

Lemery, Iloilo–May persons of interest nga ginasunod ang police sa pagpatay kay Dexter Wayne Peñalosa kag sa bata sini nga lalaki nga tatlo ka tuig sa Barangay Cabantohan kahapon, Oktubre 8.

Suno kay PINSP Ariel Buenavista, OIC sang Lemery MPS, nagatipon na sila sang mga ebidensiya para makapasaka sang kaso batok sa mga suspetsado. Ginapatihan sini sa tatlo tubtub lima ang suspek sa krimen.

Posible sa atubang ang una nga pagtiro suno kay Buenavista rason nga naigo pati ang bata.

Nagpabulig na sa scene of the crime operatives (SOCO) ang Lemery police para sa ballistic test sang mga baseyo sang bala nga narecover sa crime scene agud matumod kon compatible gid man sa m16.

Ginpahayag ni Buenavista nga may kapasidad man nga magbatu si Dexter bangud may dala nga 45 kalibre nga pusil ang biktima sang mapatay siya.

Nagasakay sa motorsiklo ang mag-amay pakadtu sa Lemery sang ginbantayan kag gintiro sa katubuhan kag kamaisan nga parte sang Brgy. Cabantohan.

Ginmandu naman ni Lemery Mayor Ligaya Apura sa police ang pagdakop, buhi man ukon patay, sa mga suspetsado.

Ginkasubo sang alkalde nga nadalahig ang bata kon may yara gid man sang hiligut-anon ang biktima kag ang mga suspetado. (AGB)