1 sa 5 ka gunmen nga nag-masaker sa siyam ka bag-o recruit nga miembro sang NFSW sa Sagay City, Negros Occidental, nakilala na
Negros Occidental — Nakilala ang isa sa lima ka gunmen nga nag-masaker sa siyam ka bag-o recruit nga miyembro sang National Federations of Sugarcane Workers sa Hacienda Nene, Barangay Bulanon, Sagay City sang Oktubre 20 sang gab-i.
Suno kay Police Regional Office 6 Director Chief Supt. John Bulalacao, gintudlo sang testigo nga tumandok sang Barangay Bulanon ang isa sa mga gunmen gani iya nakilala. Nagbalibad naman si Bulalacao nga ibuyagyag ang identity sang amu nga gunman bangud nagapadayon ang imbestigasyon.
Away sa duta ang nagapanguna nga anggulo nga ginasunod sang police suno kay Bulalacao. Napatay sanday Morena Mendoza, 49, Brgy Bulanon, Sagay City; Marcelina Dumaguit, 66 kag Rannel Bantigue, 41, lunsay sang Brgy Plaridel; Eglicerio Villegas; Angelie Arsenal; Paterno Baron; Rene Laurencio; kag duha ka menor-de-edad nga sanday Jomarie Ogahayon, 16, kag Marchtel Sumicad, 17 anyos.
Ginahamyang ang bangkay sang mga biktima sa New Government Center sang Sagay City LGU.
“Mastermind”
Posible nga interesado sa duta ang mastermind sa pagpatay sa siyam ka miembro sang National Federations of Sugarcane Workers sa Hacienda Nene, Barangay Bulanon, Sagay City sang Oktubre 20 sang gab-i.
Apang nagbalibad na nga maghatag sang dugang nga komento si Police Regional Office 6 Director John Bulalacao bangud nagapadayon ang imbestigasyon. Una na sini ginbuyagyag nga may testigo sila kag nakilala sini ang isa sa lima ka gunmen nga ginpahayag tumandok man sang Barangay Bulanon.
Gin-updan ni Bulalacao sa ocular inspection sa crime scene kahapon sang hapon sanday AFP Chief of Staff Lieutenant General Carlito Galvez Jr kag Negros Occidental Police Provincial Office Director Rodolfo Castil Jr.
Sa siyam ka ginpatay paagi sa pagtiro, tatlo ang ginbubu-an sang gasolina kag gintutdan nga amo sanday Morena Mendoza, 49, Brgy Bulanon, Sagay City; Marcelina Dumaguit, 66 kag Rannel Bantigue, 41, lunsay sang Brgy Plaridel samtang ang iban pa ka biktima amo sanday Eglicerio Villegas; Angelie Arsenal; Paterno Baron; Rene Laurencio; kag duha ka menor-de-edad nga sanday Jomarie Ogahayon, 16, kag Marchtel Sumicad, 17 anyos. (JoMaque)
(JoMaque)