Liwat nga pagbukas sang Boracay sa mga turista subong nga adlaw, gindugukan sang mga turista; gobyerno, nagpatuman sang mas ma-id-id nga sistema antes makasulod sa isla

Boracay Island, Aklan–Liwat nga ginbuksan ang Boracay sa mga turista matapos ginpa-idalum sa anum ka bulan nga rehabilitasyon.

Opisyal nga gindeklarar ni Department of Tourism (DOT) Secretary Bernadette Romulo-Puyat ang reopening sang isla sa programa sa Cagban Jetty Port kaina sang aga, Oktubre 26. Kadungan sang programa, ginpakita man ang Boracay icon nga mangin ‘selfie background’ sang mga turista.

Sa press conference pagkatapos sang programa, ginpahayag ni Department of Interior and Local Government (DILG) Secretary Eduardo Año nga magapadayon ang rehabilitasyon bisan ginbuksan na ang isla.

Suno kay Año, 50 porsyento pa lang ang nahimo nga rehabilitasyon sa bilog nga Boracay kag matapos ini sa masunod nga tuig.

Hugot nga ipatuman sa bag-o nga Boracay ang mga environmental laws agud masiguro nga indi na maabusuhan ang isla nga ginakabig isa sa pinakamanami sa bug-os nga kalibutan.

Gindayaw sang mga turista ang daku nga pagbag-o sa Boracay bisan pa may mga nanugon nga wala pa ginapasugtan ang pila ka water activities.

Naghawan ang beach front kag wala na sang makita nga obstructions matapos nga ginpatuman sang gobyerno ang 25+5 easement. Makita man ang hugot nga pagbantay sang mga otoridad. (AGB/ATT)