Bana kag ginpahayag kerida, nabun-an sang asawa sa Molo

Molo, Iloilo City – Pilason ang bana kag ginpahayag kerida niya sang nabun-an sang asawa sa Molo kagab-i, Nobyembre 6.

Suno kay Alyas Lyn, 45, magkaupod sa trabaho ang iya bana nga si Alyas Rico kag ginpahayag kerida nga si Alyas Rina sa balay sang isa ka doktor.

Kaina nagpadulong siya sa gina-ubrahan sang iya bana bangud duha ka adlaw na ini nga wala nakapauli sa ila balay agud magpangayo sang kwarta.

Nakita niya nga ginsakit ni Rico ang iya duha ka bata sang ginhana nila nga patup-an ang kerida.

Bangud sa kaakig, may ginkuha si Lyn sa kusina nga iya gingamit sa pagbuno sa duha. Indi na madumduman ni Lyn kun ano ang iya gingamit sa pagbuno sa duha.

Sa panaysayon ni Lyn, nabasahan niya sa cellphone ang mga text messages sang kerida kag daw kasubong nga ini pa ang legal nga asawa. Nabasahan man niya sa text sang iya bana sa kerida nga islan na niya ang asawa bangud mabaho na ini kag tigulang na. “Gha” pa suno kay Lyn ang tawganay sang duha.

Sang Oktubre 10, ginpahayag sang asawa nga nadakpan niya nga nagapakighilawas ang iya bana kag kerida sa balay mismo sang doktor nga ila gina-ubrahan.

Nakahanda man si Lyn nga itugyan kay Rina ang iya bana apang sa iya lang ihatag ang sweldo kada bulan.

May pito ka mga kabataan ang mag-asawa lakip ang siyam ka bulan nga lapsag.

Preso sa Molo Police Station si Lyn kag 18-anyos nga bata niya samtang ginkustodiya sang WCPD ang 16-anyos pa gid niya nga bata. (JoMaque)