2 lakip ang pakaisa ni Councilor Plaridel Nava, patay sa pagpangtiro sang riding-in-tandem sa Calajunan, Mandurriao

Iloilo City— Napatay samtang ginabulong sa ospital sanday Mercedes “Gingging” Nava, 65-anyos sang Mejorada St., Mandurriao, kag Erwin Fontillas, 41-anyos sang R. Mapa St., Mandurriao, matapos gintiro sang riding-in-tandem sa Barangay Calajunan, Mandurriao kaina sang aga, Enero 4, 2019.

Ini ang ginkumpirmar ni Chief Inspector Marlon Valencia, hepe sangMandurriao Police Station.

Suno kay Valencia, may pilas sa lawas kag ulo si Nava samtang may pilas naman sa dughan si Fontillas.

Posible may kaangtanan sa utang ang krimen suno kay Valencia bangud sang ginpahayag mga estafa nga kaso ni Nava.

Ginpabutyag naman sang pamilya ni Nava suno kay Valencia nga wala sang kontra ang biktima magluwas sa ila man himata nga si councilor Plaridel Nava.

Una na ginpahayag sang 16-anyos nga si alyas Sam, kaupod nanday Nava kag Fontillas nga nakasakay sa pick-up sang gintiro sang riding-in-tandem, nga si Nava gid ang target sang gunman matapos niya siya ginpalapitan kag gintiro.

Si Mercedes Nava ang pakaisa ni councilor Plaridel Nava. (AGB)