Kaso kriminal, ipasaka ni Councilor Plaridel Nava sa 17 ka pulis lakip ang ICPO director nga iya na una ginpasakaan sang kaso administratibo sa Ombudsman

Iloilo City — May ipasaka pa nga kaso kriminal ang mag-utod nga Roy kag Rey Julius “Tata” Delos Reyes batuk sa 17 ka pulis nga nagdakup sa ila matapos gintudlo nga nagpatay kay Mercedes “Ging-Ging” Nava sang Enero 4.

Ini ang ginkumpirmar ni Councilor Plaridel Nava matapos siya nag-file sang kaso administratibo sa Ombudsman kahapon (Pebrero 6) batuk sa 17 ka pulis lakip kanday ICPO Director Martin Defensor Jr kag; Supt. Jonathan Pablito nga hepe sang Police Station kag Chief Inspector Marlon Valencia, hepe sang Mandurriao Police Station.

Suno sa konsehal, ara na ang draft sang criminal complaint kag ginahulat na lang niya nga makatyempo ang mag-utod nga Delos Reyes nga makaguwa kag makasumpa sa atubang sang Ombudsman kag maka-file sang apat tanan ka kaso kriminal.

Ginpanindugan ni Nava nga agrabyado sila sa ginhimo sang mga pulis.

Nakita sang konsehal nga may motibo sa pag-aresto sa duha niya ka bodyguards bangud wala sila naghatag sang tyempo agud mag-imbestigar sang maayo kag nag-imbitar sang iban nga testigo.

Gindakup lang suno sa iya ang iya duha ka bodyguards nga wala sang warrant of arrest kag ginrason nga kabahin sang hot pursuit operation.

Ang masakit pa gid suno kay Nava amu ang ginpahayag pag-planted sa ila sang ebidensya kag paguwaon nga nagabitbit sila sang granada. (AGB/JGM)