Barangay tanod, pilason matapos gintiro sang barangay kagawad sa Mandurriao

Mandurriao, Iloilo City – Pilason ang barangay tanod nga si Billy Daquin matapos natiruhan ni anay kapitan kag subong Barangay Kagawad Arsenio Gabanto sang Q. Abeto, Mandurriao.

Natabu ang insidente sa Sitio Sampaguita, Hibao-an Sur, Mandurriao pasado las-5 kahapon sang hapon, Marso 3.

Suno kay Gabanto, naakig siya bangud masami siya nga ginasukmaan ni Daquin nga disiplinahon ang iya asawa.

Ginatudlo-tudlo pa siya sa agtang ni Daquin.

Iya man gintawag nga suplado kag tikalon ang biktima.

Sa initial nga imbestigasyon sang Mandurriao police, naga-repair sang salakyan ang biktima sang gintiro ni Gabanto.

Napilasan sa tuo nga parte sang iya guya si Daquin.

Gin-aku naman sang kagawad nga naka-inom siya sang natabu ang insidente.

Nag-surrender sa kapulisan si Gabanto pero wala na niya nadala ang pusil nga iya gin-gamit.

‘DISIPLINAHON ANG KERIDA’ 

Nagpahayag naman si Edna, asawa sang biktima nga ginsukmaan gid man sang iya bana sadto ang kagawad nga disiplinahon ang iya ginpahayag kerida.

Suno kay Edna, masami nga ginabuyayaw sang ginpahayag kerida ni Gabanto ang iya bana.

Natalana nga operahan ang biktima bangud sa pilas nga iya naagom.

Ma-file naman sila sang kaso batuk sa kagawad. (JoMaque)