Lapsag nga na-comatose matapos ginbun-ag sa Dumangas District Hospital, napatay

Iloilo City — Napatay ang lapsag nga ginpahayag na-comatose matapos ginbun-ag sa Dumangas District Hospital.

Ginkunfirmar sang iloy nga si Jomalyn Galero, nga napatay pasado las syete sang aga sang Marso 9 si Baby Girl sa pribado nga ospital sa syudad.

Wala pa natul-id kun ano ang kawsa sang kamatayon ni Baby Girl apang una na ginpahayag sang amay nga si Romel,nga wala na nila ginbakal ang ginreseta nga mga bulong sa lapsag sugod sang Marso 8 bangud sa kakulang sa pinansyal.

Nahamyang ang bangkay ni Baby Girl sa punerarya sa Dumangas.

‘MASAKIT’

Ginpabutyag sang iloy nga masakit sa ila pamilya ang natabo sa iya ika-anum nga bata.

Naglaum ang iloy nga makarecover si Baby Girl matapos gindala sa pribado nga ospital sa syudad apang napatay.

Matandaan, nagreklamo ang iloy nga ginpilit sang mga doctor kag nurse sa Dumangas District Hospital nga paguwa-on ang iya lapsag bisan indi na niya masarangan.

Gina-imbestigaran pa sang tagdumalahan Dumangas District Hospital ang insidente. (JoMaque)