Soldado, pilason sa engkwentro sa Igbaras
Igbaras, Iloilo – Pilason ang soldado sa engkwentro batuk sa ginapatihan nga mga miembro sang New People’s Army sa Sitio Igburay, Barangay Indaluyon kahapon sang kaagahon, Marso 20.
Ginconfirmar ni Lieutenant Colonel Sisenando Magbalot Jr., commanding officer sang 61st Infantry Battalion sang Philippine Army, nga napilasan sa tuo nga guya si Private First Class Bryan Sillo pero estable na ang kondisyon matapos ginbulong.
Nagapati si Magbalot nga may pilason man sa mga rebelde bangud sang tinulo sang dugo nga nakita sa lugar. Naglawig suno sa iya sang 15 minutos ang engkwentro batuk sa ginapatihan Sibat Platoon, Southern Front sang Komiteng Rehiyon-Panay.
Na-recover sa lugar ang isa ka claymore mine; pito ka backpacks; duha ka detonators sang IEDs; duha ka hand-held radios; duha ka cellphones; duha ka posas; duha ka magazine sang M16 kag 14 ka bala sang 7.62 mm.
Ang natabu kahapon, ikatatlo na nga engkwentro sa tunga sang 61st IB kag ginapatihan NPA subong nga semana sunod sa engkwentro sa Mulangan, Igbaras sang Marso 17 kag San Remigio, Antique sang Marso 19.
Nagpasalig naman si Magbalot nga indi sila mag-untat sa pagpapas sa mga rebelde. (AGB)