City kag provincial gov’t, handa na sa untat-biyahe sa Setyembre 30

By: JoMaque | Setyembre 28, 2019

Iloilo — Naghimo sang contingency plan ang city government, provincial government kag mga ahensya sang gobierno para sa mga maapektuhan sang nationwide transport strike sa Lunes, Setyembre 30.

 Nahisugtan sa tiun sang inter-agency meeting kahapon ang pag-deploy sang mga salakyan umpisa las 6 sa aga.

20 ka salakyan ang i-deploy sang City Government, duha halin sa Philippine Coast Guard, duha ka 6 by 6 trucks kag anum ka patrol cars sang Philippine National Policem duha ka 6 by 6 trucks sang Army, isa ka bus sang Bureau of Jail Management and Penology kag anum ka salakyan sang Land Transportation Office.

Magaserbe nga pick-up points ang anum ka district plazas kag pito ka transport terminals sa syudad.

May ipahamtang man nga mga Police Assistance Desks, CDRRMO/Iloilo City Emergency Responders kag City Health Office Emergency Medical Service sa tanan nga plaza kag terminals.        

Samtang ma-deploy man ang Provincial Capitol sang mga salakyan para sa ila mga empleyado kag regular commuters.

Magaserbe pick-up point para sa mga pasahero halin sa probinsya sa Lunes sang aga ang Ungka Terminal, Tagbak Terminal kag Mohon Terminal.