Bangkay sang babaye kag lalaki, nasapwan sa balay sa Oton

By: Aine Grace Bravo | December 28, 2020

OTON, Iloilo –Wala pa sang ginasundan nga anggulo ang Oton police sa pagpatay sa babaye kag lalaki nga nasapwan sa balay sa Barangay Botong, Oton kahapon, Disyembre 27.

Suno kay PSSg Alex Esteves, imbestigador sang Oton MPS, wala sila sang nakita nga patimaan nga pagpangawat ang motibo bangud wala man naga-ulukay sa sulod sang balay.

May nakita sa sulod sang balay nga mga IDs nga nakapangalan kay Anthonio Cabanatan, pero may lain-lain nga address.

Ginkumpirmar ni Esteves nga naga-anggid ang hitsura sang napatay nga lalaki kag ang litrato sa mga IDs.

Wala sang may nakita nga IDs para nga nakapangalan sa babaye.

Na-recover sa kwarto sa diin nasapwan ang babaye ang libro kag pusil, suno kay Esteves. Pero indi niya makumpirmar kun gingamit sa krimen ang pusil.

Nasapwan ang mga biktima nga may agi sang pagkuga kag agi sang higut sa liug. –via Angel Mae Ciudad