ECQ sa ginabanta 200 ka pamalay sa Brgy. Imbang Pequeño, San Enrique, gin-extend sang tubtob sa Pebrero 22
San Enrique Iloilo, — Ginpalawig tubtob sa Pebrero 22 ang pagpaidalum sa Enhanced Community Quarantine sa ginabanta 200 ka mga households sa Barangay Imbang Pequeño.
Suno kay San Enrique Mayor Trixie Fernandez, nagtakop kahapon, Pebrero 15, ang ECQ sa nasambit nga barangay magluwas sa Zones 1 tubtob 3.Pebrero 9 sang ginpaidalum sa ECQ ang bilog nga barangay bangud nagpositibo ang pito (7) ka residente nga naga-obra sa URC- Sugar Central.
Sa nasambit nga compound nagapauli ang pito ka mga personnel sang URC-Sugar Central nga nagpositibo sa COVID-19.
Ginadumilian ang pagguwa sa balay sa lugar nga sa idalum sang ECQ magluwas kun may emerhensiya ukon kinahanglan magbakal sang kinahanglanon apang isa lang ka miembro sang pamilya.
Nagpasalig man si Mayor Fernandez nga may assistance sila nga ginhatag sa mga apektado.
Wala sang available data si Mayor Fernandez kun pila ang identified close contacts sang pito ka nagpositibo apang symptom-based ang ila nga approach.
Mas maayo nga tapuson na lang ang 14 ka adlaw nga pag-quarantine sa nasambit nga lugar agud makasiguro suno sa alkalde.
Ang URC-Sugar Central ang nahamtang sa Barangay Imbang Pequeño.
Sa 634 ka mga personnel nila, 16 ang nagpositibo. 12 sa amo nga numero ang taga-San Enrique samtang apat (4) ang taga-Passi City.
Nagpahanumdom si Mayor Fernandez sa pag-observe sa gihapon sang mimimum health standards kasubong sang paggamit sang face mask kag face shield, physical distancing, kag masami nga paghugas sang kamot ukon paggamit sang alcohol ukon sanitizer agud malikawan nga matapikan sang COVID-19. — via Aljohn Torreta
