Mangunguma, patay sang gintiro sang kasubong niya nga mangunguma sa Barotac Viejo

BAROTAC VIEJO, ILOILO – Patay ang 48-anyos nga mangunguma sang gintro sang kasubong niya nga mangunguma sa Sitio Agcatmon, Brgy. Gen. Luna, kahapon sang aga.

Ginkilala ang biktima kay Fred Asistido sang amo man nga barangay kag may pilas sa wala nga parte sang dughan kag abaga. Suspek naman sanday Roland Caballero kag Roy Padilla.

Suno kay SMSgt. Rodolfo Prudente Jr., imbestigador sang Barotac Viejo Police Station, antes natabo ang insidente, nangsarahe pa sang kahoy sa bukid ang biktima upod sa iya duha ka mga utod.

Samtang nagapanghagbas sang hilamon, ginpalapitan siya ni Caballero kag gintiro.

Nagpalagyo naman ang mga kaupod sang biktima. Ginpanginwala ni Caballero nga siya ang nagtiro kay Asistido pero siya ang ginatudlo sang mga witness nga nagpalupok sang pusil.

Nagserbe naman nga look out ang kaupod niya nga si Padilla.

Away sa duta ang ginalantaw nga motibo sang police sa insidente bangud may mga record na ang duha may kaangtanan diri. Preso na si Caballero samtang at large si Padilla. — via Aksyon Jil Caceres/Aksyon Kikik Enar