2 patay, 1 kritikal kag 16 pilason sang nabungguan sang dump truck ang depasahero nga jeep sa Leganes
ILOILO — Patay na sang nag-abot sa ospital ang duha ka lalaki nga lakip sa 19 ka mga pasahero sang jeep nga nabungguan sang dump truck sa circumferential road sa Barangay San Vicente, Leganes mga las 6:30 kahapn sang aga.
Ginkilala ang napatay kanday Lemuel Magbanua, 36, kag Rene Magno, 45, lunsay residente sang Brgy. Tamu-an, Janiuay. Samtang ang kritikal naman si Rica Parpa.
Sa imbestigasyon ni Police Staff Sergeant Jhon Mark Tuazon, imbestigador sang Leganes Municipal Police Station, nagapalumbaanay ang dump truck nga ginamaneho ni Ivan Casabuena, 34, sang Calinog kag isa pa gid ka truck kag posible nga wala niya nakit-an ang nagatabok nga depasahero nga jeep nga ginamaneho ni Paulino Alcampar Jr., 69, sang Janiuay, Iloilo rason nga nalab-ut gid ang buli sang jeep.
Nahulog sa talamnan ang jeep bangud sa impact kag nagtabog kanday Magno kag Magbanua, samtang napilpilan naman sa idalum sang jeep si Parpa.
Dugang pa ni PSSgt. Tuazon, ginapanag-iyahan ni Calinog Mayor Francisco Calvo ang dump truck.Ginahulat na lang sang Leganes Police ang desisyon sang pamilya sang mga biktima kun mapasaka sang kaso batok sa driver sang dump truck.
Padayon pa nga ginabulong sa ospital ang 16 pa ka mga individual nga napilasan sa insidente.
Duha ka jeep ang ginsakyan sang magpamilya nga masimba kuntani sa Leganes kag mapa-beach sa Oton. — via Aksyon Cedirck Anona
