Mangunguma sa Pototan, patay sang gintiro sang operator sang harvester nga karelasyon sang iya asawa sang una
POTOTAN, ILOILO – Patay ang 44-anyos nga mangunguma sang gintiro sang operator sang harvester sa Brgy. Dawis mga las-7:30 kagab-i, Mayo 17.
Ginkilala ang biktima kay alyas Danny, nga napilasan sa liog kag dead-on-arrival sa ospital.
Suspect naman si alyas Leo, 47-anyos nga padayon pa nga ginapangita sang kapulisan.
Suno kay SSgt. Raffy Gonzales, imbestigador sang Pototan Police Station, nagalantaw sang TV si Danny upod sa iya 13-ayos nga bata antes natabo ang krimen. Ginlantaw niya ang mga nagatinaghol nga ido sa ila pwertahan sang gulpi lang may naglupok. Nakit-an na lang siya sang iya bata nga nagahuray-ad na sa salog kag dugu-on. Nakita man sang bata si Leo nga nagapalagyo.
Posible suno kay SSgt. Gonzales nga nagdumot ang suspect sa biktima bangud sang 2019, ginmartilyo ni Danny si Leo sa ulo sang naabtan niya ini sa ila balay nga nagapakighilawas sa iya asawa.
