66-anyos nga lalaki, nasapwan patay sa Concepcion, Iloilo

ILOILO — Patay na sang nasapwan ang 66-anyos nga lalaki sa kilid sang puno sang batwan sa Sitio Dadoy, Brgy. Nipa, Concepcion mga las 7:30 sang aga.

Ginkilala ang napatay kay Alfredo Jovillo kag residente sang amo nga barangay.Suno kay Police Senior Master Sergeant Edzel Ray Casia, imbestigador sang Concepcion Municipal Police Station, naghalin mga las 8 sa aga si Jovillo sa ila balay pakadto sa Mt. Apitong agud nga magpanguha sang batwan para ibaligya.

Dugang pa ni PSMS. Casia, natingala ang mga kabataan sang senior citizen nga wala pa siya nakapuli rason nga ginpangita nila ang amay halin kagab-i tubtob la-1 sa kaagahon.

Mga las 7:30 kaina sang aga, nasapwan sang iya anak nga si Jobert Jovillo nga patay na ang iya amay.

Nagapati naman ang pamilya ni Alfredo nga nahulog ang ila amay sa puno sang batwan kag nakalampos ang ulo sa bato suno pa kay PSMS. Casia.

Ginkumpirmar naman sang imbestigador nga wala sang patimaan nga may foul play nga natabo. — via Aksyon Cedrick Anona