Bangkay sang lalaki nga nasapwan sa Sooc, Arevalo, ginkilala sang iya pamilya

ILOILO CITY — Ginkilala na sang iya pamilya ang bangkay sang lalaki nga nasapwan sa gina-obra nga Sunset Boulevard sa Sooc, Arevalo kahapon, Hunyo 8.

Suno kay Police Major Chen Tañagras, hepe sang Arevalo police station, ginkumpirmar sang iya pamilya nga si Jhon Louie Sevilla Macogue alyas JL, ang bangkay, 23-anyos nga may address sa Rima Rizal, City Proper.

Kasunod ini sang pagkadto sang menor-de-edad nga utod ni Macogue sa punerarya kahapon sang aga.

Ginkumpirmar man ni Tañagras nga si Macogue ang suspek sa pagpatay kay alyas Apple, ang babaye nga nagatindog sa Valeria-Ledesma Streets, City Proper sang Hunyo 6 sang kaagahon.

Si Macogue ang isa sa mga suspects nga ginpasakaan sang kaso nga murder sang Iloilo City Police Station 1 kahapon sang aga.

Base sa pagpangusisa ni Tañagras, drug surrenderer si Macogue sa South San Jose, Molo.