1 patay 3 pilasan sa pagbungguanay sang duha ka motorsiklo sa San Rafael, Iloilo
ILOILO — Patay ang 18-anyos nga lalaki nga nagamaneho sang iya motorsiklo sang nabungguan sang kasugata niya nga motorsiklo sa Sitio Iloko, Poblacion, San Rafael, Iloilo la-1 kaina sang kaagahon.
Ginkilala ang napatay kay John Mark Buenacosa, residente sang Rizal, Barotac Viejo samtang ang nagbunggo amo si Joart Densin sang Lemery, Iloilo.
Suno kay Police Lieutenant Johnny Oro, Officer-In-Charge sang San Rafael Municipal Police Station, ginlaksam ni Densin ang linya ni Buenacosa rason nga nagbungguanay ang duha ka motorsiklo.
Pilason man ang backrider ni Densin nga sanday Edmark Ansoyun kag Ronibic Singuan.
Nakainom naman kanday Densin kag duha niya ka mga angkas suno kay Oro.
Naka-hospital arrest si Densin bangud sa mga naagum nga pilas sa nagkalain-lain nga parte sang iya lawas.
Samtang out-patient naman si Ansoyun kag Singuan.
Wala pa makapakig-angut ang pamilya ni Buenacosa sa San Rafael Police kun mapasaka sila sang kaso batok kay Densin. — via Aksyon Cedrick Anona
