2 patay sang na-aksidente ang motorsiklo sa Arevalo
ILOILO CITY — Patay ang mag-abyan nga sakay sang motorsiklo sang na-aksidente sa Brgy. Dulonan, Arevalo las-12:30 kahapon sang kaagahon, Agosto 15.
Ginkilala ang driver sang motorsiklo kay Raymart Donduyano, 26-anyos samtang angkas si Ryan Tolentino, 26 nga lunsay residente sang amo man nga lugar.
Suno kay Police Lieutenant Colonel Marlon Valencia, head sang Traffic Investigation and Enforcement Section (TIES) sang Iloilo City Police Office (ICPO), halin sa baybay ang mag-abyan kag papuli na kun tani sang naaksidente.
Base sa imbestigasyon ni Valencia, posible madasig ang pagmaneho sa motorsiklo rason nga gulpi lang nagtaklad sa sidewalk kag nakabunggo sa pader.
Ginpahayag sang pulis nga antes ang insidente, may nakakita sa mag-abyan nga nag-inum-inom pa sa baybay antes nagpauli.
Gindala pa ang duha sa ospital pero gindeklarar nga napatay bangud sang pilas sa ulo. Lunsay wala nasuksok sang helmet ang mga biktima.
