Mag-utod, patay sang na-trap sa nasunog nga balay sa Dumangas

ILOILO — Patay ang mag-utod sang nasunog ang duha ka balay sa Barangay Sulangan, Dumangas las 2:30 kaina sang kaagahon.

Ginkilala ang mga napatay kanday Eden Mae Guilaran, 21-anyos, kag Ronalie Hortinela, 15-anyos.

Suno kay Fire Senior Inspector Roberto Betamayo sang BFP-Dumangas, na-trap ang mag-utod samtang nagakasunog ang ila balay.

Sa initial nga imbestigasyon sang BFP-Dumangas, naghalin ang kalayo sa kwarto sang mag-utod.

Ginapanag-iyahan ni Rojo Hortinela ang balay. Naulamid sa sunog ang balay sang iya utod nga si Raween Hortinela.

Gina-imbestigaran pa suno kay FSI Betamayo kun ano ang ginhalinan sang kalayo.

Ginabanta sa masobra P3.9 million ang kahalitan sa sunog.