19 ka crew, kapitan sang sakayan nga wala sang pangalan, gin-aresto sa kadagatan nga sakop sang Carles
ILOILO — Gin-aresto sang Concepcion police ang 19 ka crew lakip na ang boat captain sang sakayan nga ginpahayag nagpalagyo sang ginpalapitan sang Bantay Dagat sa kadagatan sakop sang Brgy. Polopiña, Concepcion kahapon sang kaagahon, Setyembre 12.
Ginkilala ang arestado kanday Ricky Compa, Boat Captain; Aranel Orteza; Ramon Adrias; Jeff Badana; Rainstar Odiaman; Abelardo Dejan; Jay-R Gregorio; Edwin Carmen; Rezel Patricio; Leo Dela Cruz; Bernabe Montecalvo; Rolan Leono; Jomarie Oquia; Joey Ducanes; Ryan Hilangga; Jean Borres; Ronnie Onilonggo; Rex Gabosol; kag Romel Tolosa.
Suno kay Police Senior Master Sergeant Edzel Ray Casia, imbestigador sang Concepcion Municipal Police Station, las-8 sang gab-i, Setyembre 11 sang nakita ni Police Corporal Rommel Salvaria kag mga personnel sang Bantay Dagat ang sakayan nga wala sang pangalan.
Bangud sini, ginpalapitan nila ang sakayan kag may nabatian nga nagpalupok.
Gilayon nga nagpalagyo ang sakayan suno kay Casia kag ginbungguan pa ang katig sang Bantay Dagat kabangdanan natumba si Salvaria suno kay Casia.
Samtang nagapalagyo ang sakayan, may ginpanghulog nga sako sa dagat ang mga crew suno sa pulis.
Las-2 sang kaagahon sang nalab-ut sang Bantay Dagat ang sakayan kag na-aresto ang 19 ka crew lakip ang boat captain. Napilasan man ang duha ka crew bangud nagpalupok ang Bantay Dagat.
Sa imbestigasyon sang pulis, halin sa Carles kag padulong kuntani sa Palawan ang sakayan nga nagapangisda.
Gin-impound sang Bantay Dagat ang sakayan kag na-recover ang bunot sang lubi, mga abono nga ammonium nitrate, kag ginpahayag mga gamit sa pag-obra sang dinamita.
Ginpanginwala naman sang boat captain nga ginbungguan nila ang katig sang Bantay Dagat kag nanindugan nga wala sila nagpalupok kag wala man may ginhulog nga sako sa dagat.
Sa pihak sini, ginpaathag sang kapitan nga wala pa sila nakakuha sang lisensya para sa sakayan bangud bag-o lang ini ginbakal sang iya magulang. Wala sang pangalan ang sakayan bangud ginaplanuhan pa lang suno sa kapitan.
