Chief security patay sang gintiro sang mga nagasakay sa motorbanca sa Carles, Iloilo

CARLES, Iloilo – Patay na sang nakit-an ang chief security sang NBMD Security Agency nga nadula sa kadagatan sang Carles matapos nahulog sa ginasakyan nga motorbanca sang Sabado sang gab-i, Setyembre 10, 2022.

Gintiro si Wilson Gait alyas Muslim sang mga nagasakay sa isa pa ka sakayan sa Barangay Bito-on, Carles.

Sa pagpangusisa ni PMAJ Nestor Bacuyag, hepe sang Carles MPS, posible nga si Gait ang target sang mga suspek si Gait.

Kaupod ni Gait nga nagasakay sa motorbanca kanday Joenard Barcenilla, 54-anyos, driver sang security agency; kag mga security guards nga sanday Amir Alikan, Hamin Cunda, Bobby Ajusan nga boat man kag pasahero nga si Jerry Dela Cruz nga naghingyo lang nga masakay bangud mapa-Sicogon man siya.

Suno kay Bacuyag, indi kilala sang mga taga-security agency si Dela Cruz.

Sa panaysayon naman sang mga security guards, nagpangabay sa ila si Dela Cruz nga madungan sa ila sakayan bangud sa Sicogon man siya makadto.

Samtang nagapakadto sa Sicogon, gulpi lang may nagtupad nga isa pa gid ka motorbanca nga sakay ang tatlo ka mga lalaki.

Nagpamangkot ang isa sa mga suspek sa mga security guards kun sin-o sa ila ang Muslim apang wala sang nagsabat.

Gulpi lang gintiro si Gait sang apat ka beses rason nga nahulog sa motorbanca.

Ginkulbaan ang apat pa ka mga kaupod ni Gait rason nga naglumpat man sila sa sakayan.

Nakita sang mga security guards sang ulihi nga nagsakay sa motorbanca sang mga suspek si Dela Cruz.

Nadala sang mga suspek ang P320,000 nga i-sweldo pa kuntani sa mga empleyado sang security agency.

Base sa description sang mga security guards, puti ang color sang motorbanca sang mga suspek nga may yellow nga lining.

Wala pa sa gihapon sang identify ang Carles police ang mga suspek. –via Angel Mae Ciudad