Tricycle drivers association sa Dumangas port, ipatawag sang punong barangay sang Sapao bangud sa reklamo sang mga taxi drivers

Ipatawag ni Sapao, Dumangas Punong Barangay Robert Samson ang mga miembro sang Sapao-Naluoyan-Poblacion Tricycle Owners and Drivers Association (SNPTODA) agud hambalan ang reklamo sang mga taxi drivers nga ginasukot sila sang mga tricycle drivers kun mag-pick up sila sang mga pasahero sa Dumangas Port.

Suno sa kapitan, wala nila ginatolerar ang aktuwasyon sang mga tricycle drivers.

Ginpahayag niya nga nakalab-ut naman sa iya ang parte sa reklamo sang mga taxi drivers apang wala pa sang may nakahatag sang formal complaint.

Dugang pa ni Samson, nagahulat lang siya sang pormal nga reklamo agud nga maka-aksyon sa problema.

Pero ginpabutyag niya nga LGU ang dapat mag-address sa reklamo bangud sila man ang naga-isyu sang prangkisa sang mga tricycle.

May task force man suno sa kapitan nga naka-assign sa Dumangas Port kun diin pwede makapalapit kag makapangayo sang bulig ang mga taxi drivers.

Magluwas diri, may ginhatag man siya nga hotline number nga pwede ma-contact sang mga taxi drivers nga mag-reklamo.

Mahimo maka-contact ang mga taxi drivers sa 0995-427-3990.