(UPDATE) Pamilya sang soldado nga gin-strafing ang balay sa Barotac Viejo, nagapati nga nasal-an lang ang biktima

Barotac Viejo, Iloilo–Nagapati si retired technical sergeant Edmond Barrida sa pahayag ni San Lucas Punong Barangay Eddie Lumampao nga posible nasal-an nga balay sang mag-utod nga lalaki nga ginkuha sang mga armado nga lalaki sang nagligad nga semana ang balay sang iya manghod nga si Army Corporal Felizardo Barrida.

Suno sa retirado nga suldado, nakasugid sa iya ang utod kagab-i nga kapareho sa panglawason kag kataason sang mga lalaki nga nagkuha sa mag-utod ang mga suspek nga nagpaarak tiro sa iya balay. Apang palaligban sa iya ang ginpahayag pagtiner sang mga suspek sa masi-ut nga parte sang lugar malapit sa balay sang iya utod kag daw naga-surveillance sa balay. Pamatuod diri ang nakita nga mga pakete sang biskwit kag putos sang dulce nga ginapatihan ginkaon sang mga suspek.

Wala naman naglaum ang hinablos ni Corporal Barrida nga sudlon sang armado nga mga lalaki ang ila lugar kag paarakan-tiro ang balay sang iya tiyo. Suno kay Francis Barrida, 32-anyos, masi-ut kag madulom ang palibot sang balay sang iya tiyo kag hulungdon ang lugar gani wala siya sang matumod nga rason sa natabu.

Ginsaysay ni Francis nga ara sila sang iya tiyo sa terasa sang balay sang gulpi lang  ginpaarakan tiro. Nakapalagyo si Francis  paagi sa pagbukas sa puwertahan sang kusina kag naglumpat sa cyclone wire gani nagasgasan siya.

Napilasan sa wala nga paa kag tuo nga batiis si Corporal Barrida kag padayon nga ginabulong sa Western Visayas Medical Center. (AGB)