Mga nagkadto sa Lechon Festival sa Santa Barbara, Iloilo na-‘frustrate’
ILOILO — Na-frustrate ang kalabanan nga nagkadto sa Lechon Festival sa Santa Barbara sang Domingo, Nobyembre 27.
Suno kay Jose sang Pavia, Iloilo, naghingagaw siya padulong sa plaza sang Santa Barbara halin sa iya nga obra, apang napaslawan sang iya nahibaluan nga “reserved” na ang tanan nga 54 ka mga lechon nga nabutang sa tagsa ka mga kiosks.
Naghulat pa siya sang masobra isa ka oras kag tunga agud nga malasa ang lechon antes ibaligya apang wala man lang nila ma-enjoy ang ila pagpangayaw sa ginapadayaw nga lechon festival sang Santa Barbara.
Tinutuyo man lang kuntani ni Jose nga nga makabulig sa mga backyard hog raisers nga apektado sang African Swine Fever (ASF).
Madamo man sang mga foreigners kag halin sa iban nga banwa ang nagkaon na lang sa mga karinderia; fast food chain kag batchoyan bangud nga wala na nakabakal sang Lechon.
