6 ka tuig nga bata nga ginlugos kag ginpatay sa Estancia ginlubong na

ILOILO — Ginlubong na kahapon ang anum ka tuig nga bata nga babaye nga ginlugos kag ginpatay sa Barangay Gogo, Estancia sang Disyembre 19 sang nagligad nga tuig.

Gintambugan sang mga himata, mga abyan kag kakilala ang lubong ni Jackelyn bisan wala untat ang ulan. 

Agaw atensyon naman ang iloy ni Jackelyn nga si Racquel nga nagahilibiun samtang ginahakos ang pink nga school bag sang iya bata.     Wala na naghatag sang pahayag ang iloy.

Nagpasalamat naman ang amay nga si Joven Mahinay sa mga nag-unong sa ila kalisod kag sa tanan nga nagbulig para sa pagpalubong sang iya bata. 

Sa kabug-usan 70,190 pesos na ang natipon nga bulig sang Aksyon Radyo Iloilo halin sa mga tagpalamati kag Facebook followers sang estasyunan paagi sa ginlunsar nga Operation Bulig. — via Aksyon Angel Mae Ciudad/Aksyon Savannah Pamplona