ILOILO CITY — Masugod ang una nga adlaw sang Kuwaresma sa Pebrero 22 paagi sa Ash Wednesday ukon pagpalhit sang abo sa agtang sang mga deboto.
Suno kay Rev. Father Angelo Colada, director sang Commission on Social Communications sa Jaro Archdiocese, wala na sang may ginpaguwa nga pagsulundan ang Catholic Bishops’ Conference of the Philippines (CBCP) sa pag-obserbar sang Kuwaresma tungod yara naman ang pungsod sa new normal.
Nagakahulugan ini nga mabalik na ang mga kaparian sa na-andan nga pagpalhit sang abo sa agtang kun mag Miyerkules de Badlis tal-us sa pagbutang lang sang abo sa ulo sa tiun sang pandemya.
Wala naman sang restrictions sa iban pa nga mga aktibidad sang simbahan kadungan sa pag-obserbar sang Kuwaresma kapareho sang Bisita Iglesia kag pagsaka sa bukid ukon Via Crusis sa Biyernes Santo.
