NEGROS ORIENTAL – Siyam ang kumpirmado nga patay lakip si Negros Oriental Gov. Roel Degamo kag 16 naman ang pilason sa mass shooting incident kaina sang aga sa Brgy. San Isidro, Pamplona.
Magluwas sa gobernador, patay man sang gindala sa ospital sanday Jessie Bot-ay, Kagawad Jose Marie Ramirez, Jerome Maquiling, Jomar Canseco, Crispin Vallega, Florenda Quinikito, Joseph Netada, kag Michael Fabugais.
Base sa data sang Pamplona Police, 13 sa 16 ka mga pilason ang padayon pa nga ginabulong sa ospital samtang out-patient na ang tatlo.
Anum pa ang nagapabilin sa Siliman University Medical Center, duha sa Negros Oriental Provincial Hospital, apat sa Ace Dumaguete Doctors, kag isa sa Negros Polymedic Hospital.
Nahibaluan nga madamo sang tawo sa compound sang balay ni Gov. Degamo tungod nagahambal siya sa atubang sang mga 4Ps beneficiaries sang nagsulod ang armado nga mga lalaki kag naniro. – via Aksyon Radyo Bacolod
