ILOILO — Napatay sa ospital kaina sang kaagahon si baby Jap-Jap, ang duha ka bulan nga lapsag nga nalapnos ang panit sang nasunog ang ila balay sa Brgy. Agtambo, Passi City sang Pebrero 25.
Ini ang ginkumpirmar sang tiya sang lapsag nga si Cherry Mae Pacheco.
Suno kay Cherry Mae, ginsulod pa sa operating room si baby Jap-Jap las-11 kagabi agud tinlu-an ang mga paso niya sa lawas apang ala-1 sa kaagahon sang nagguwa sa OR ang doktor kag gin-declare nga nag-untat ang heart beat sang lapsag.
Madumduman nangin kritikal ang kondisyon sa ospital sang lapsag tungod sa komplikasyon sa baga kag impeksyon sa pilas sa nagkalain-lain nga parte sang lawas.
Padayon nga ginabulong sa ospital ang iloy sang lapsag nga si Mylene.
Nagapasalamat naman ang pamilya sa tanan nga naghatag sang bulig pinansyal kag pangamuyo. —via Justice Savvanah Pamplona
