Picture sang lapsag nga patay na gingamit sang scammer agud mangayo sang donation sa social media

ILOILO — Nagpautwas sang kalain sang buot paagi sa Aksyon Radyo Iloilo ang tiya sang duha ka bulan nga lapsag nga napatay sang nasunog ang ila balay sa Brgy. Agtambo, Passi City tungod gingamit sang iban nga tawo ang pictures sang iya hinablos agud magpangayo sang bulig sa social media.

Suno sa tiya nga si Mae, Marso 19 pa nila napalubong ang iya hinablos nga napatay matapos nalapnos ang iya panit sa tungod sa sunog.

Pero nakibot sila sang ginpahibalo sang OFW nga isa sa mga nagbulig para mapabulong ang bata nga may post sa Facebook gamit ang picture sang lapsag nga nagapangayo pa sang donation.

Gintinguhaan ni Mae nga i-contact ang nag-post sang mga pictures pero wala ini nagasabat kun tawgan kag gin-block man sila sa Facebook.

Nagpanawagan siya nga indi pagpatihan ang post kag nagpangabay nga kuntani indi na pagdalahigon sa pagpanunto ang iya hinablos nga madugay na nagpahuway.

Gintawgan man sang Aksyon Radyo Iloilo ang nag-post pero “unattended” na ang iya cellphone number.

‘BACKGROUND’

Pebrero 25 sang aga nasunog ang balay sang pamilya Pacheco kun diin nalapnos ang panit sang lapsag.

Gin-admit pa siya sa ospital apang nangin kritikal ang iya kundisyon tungod sa komplikasyon sa baga kag impeksyon sa iya mga pilas.