Anakbayan WVSU chapter maupod sa condemnation rally vs mga involved sa Ungka flyover
ILOILO CITY – Buylugan sang mga miyembro sang Anakbayan- WVSU Chapter ang condemnation rally buwas sa hapon agud mapasabat ang mga involved sa kontrobersiyal nga Ungka Flyover.
Suno kay Mr. Matteo Gonzaga, chairperson sang Anakbayan- WVSU Chapter, naga-antos ang mga estudyante sa palpak nga proyekto tungod nagatuga ini sa pagpugok sang trapiko nga naga-resulta sang pagka-late sang mga estudyante.
“Kami nga mga estudyante sang West Visayas State University kag iban pa gid nga State Colleges and Universities diri sa Iloilo, maga-upod gid kami buwas sa condemnation rally kay ang ini nga palpak kag depektibo nga flyover nagtuga gid sang halit sa mga commuters ilabe na gid sa amon nga mga estudyante,” suno kay Gonzaga.
Tiun man ini suno sa iya agud ipalab-ot sa gobyerno ang ila kaakig tungod may pondo para sa palpak nga proyekto pero limitado lang ang ginapain sa sector sang edukasyon.
“Amon man [ipalab-ot] ang amon nga mga frustrations, kaakig, kag disappointments sa gobyerno nga may budget sila sa mga wala pulos nga projects samtang nagapabilin nga magamay kag manubo ang budget sa edukasyon,” dugang pa niya.
Gingastuhan sang P680 million ang pagpatindog sang Ungka Flyover; naggasto ang Department of Public Works and Highways (DPWH) 6 sang masobra P13 million agud ibayad sa third party consultant agud mag-imbestigar sa pag-usmod sang proyekto. Nagakinahanglan naman sang indi magnubo sa P250 million agud igasto sa pagkay-o sang flyover.
Magluwas sa mga cause-oriented groups, maupod man sa rally ang pila ka transport groups, kag iban pa nga grupo.
