1 patay 5 pilason sang nabungguan sang motorsiklo ang tricycle sa Malusgod, Pototan

ILOILO — Isa patay kag lima ang pilason sang nabungguan sang motorsiklo ang tricycle sa Brgy. Malusgod, Pototan las 7:15 kagab-i, Hunyo 18.

Suno kay Police Staff Sergeant Amando Caporal, imbestigador sang Pototan Police Station, napatay ang pasahero sang tricycle nga si Rodita Rondobio.

Samtang, pilason naman sanday Danilo Rondobio, 60 anyos nga driver sang tricycle; Rosalyn Silverio, 22-anyos, tatlo ka tuig nga bata kag isa ka bulan nga lapsag nga lunsay taga-Jibao-an, Pavia.

Kritikal naman ang driver sang motorsiklo nga si Zeum Gabriel Abaygar, 22-anyos sang Tagbak, Jaro.

Sa imbestigasyon ni Caporal, madasig ang dalagan sang motorsiklo rason nga nadulaan si Abaygar sang kontrol sa manibela kag nabungguan ang ginasundan nga tricycle.