Liwat nga limitahan tubtob las 12 sang tungang gab-I ang pagbaligya kag pagserbe sang makahulubog nga ilimnon sa mga resto bars sa siyudad sang Iloilo.
Ini ang ginkumpirmar ni Mr. Nestor Canong, ang head sang Task Force on Morals and Values Formation.
Resulta ini suno sa iya sang meeting ni Iloilo City Mayor Jerry Treñas kaupod sa mga bar owners kag managers, ICPO Director Police Colonel Joeresty Coronica kag Police Captain Val Allan Cambel, hepe sang Mandurriao Police Station.
Ginpahayag ni Canong nga tungod ini sang mga insidente sang kinagamo sa mga balay ilimnan ilabe na sa Mandurriao sang damlag lang.
“Kadamo kita sang mga bisita pirme nga naga-alabot diri sa Iloilo. Madamo sang mga meetings kag mga conventions nga ang ila venue sa siyudad sang Iloilo. Indi kita gusto nga matublag ang aton mga bisita even ang aton nga mga residente nga nagareklamo, nagapadala sang ila text [message] kay Mayor Treñas nga nagabalik naman ang indi makontrolar nga mga hinubog, mga minaoy nga nagaresulta pirme sang ilinaway kag may nagakadug-an nga mga customer,” ang pahayag ni Canong.
Ginpabutyag ni Canong nga nagpasalig man ang ICPO nga hugton ang pagbantay agud mapabilin ang peace and order sa mga balay ilimnan.
Ginadihon na suno sa iya ang executive order ni Mayor Treñas para diri.
