Babaye nga pasahero halin sa Mandurriao tungod gindala siya sang taxi nga ginsakyan sa La Paz bisan sa Molo siya mapadulong

ILOILO CITY — Ginreklamo sang pasahero ang taxi driver nga nagdul-ong sa iya pauli tungod lain nga ruta nga iya gin-agyan pasado las kuwatro kahapon sang kaagahon, Setyembre 13.

Sa Facebook post sang babaye, halin siya sa SM Strata sa Bolilao, Mandurriao kag mapadul-ong siya kuntani sa Molo pero natingala siya nga lain ang ruta ang gin-agyan sang driver.

Suno sa babaye, nag-agi sila sa service road kag ginliko siya sang taxi driver (Merry Mart) pa-Nabitasan, La Paz imbes nga madiretso pa-stoplight (UP) kag maliko pa-Molo.

Ginhambalan pa sang babaye ang driver nga sala ang ruta nga gin-agyan niya pero nagtulok lang sang masakit ang driver kag ginpadasig pa ang dalagan sang taxi.

Maayo lang suno sa babaye nga may checkpoint sa ila gin-agyan kag nakapanaug siya kag nagpangayo sang bulig sa pulis.