“Wala kami ya involvement sa CPP-NPA” —kandidato sa pagka-barangay kagawad sa Punong, Lapuz

ILOILO CITY – Indi na bag-o para kay Vivian Asong nga nagapadalagan sa pagka-barangay kagawad sa Punong, Lapuz ang pag-angut sa iya sa CPP-NPA.

Ini ang sabat ni Asong sa naglapta nga mga flyers sa diin nasulat ang pangalan sang pila ka nagapadalagan sa Barangay & SK elections sa siyudad kag probinsya sang Iloilo nga gin-akusaran nga supporter sang NPA.

“Sang nagligad nga tinuig natapik man ang ngalan ko sa red-tagging. Indi na ni bag-o para sa akon. Kun sin-o man atong nag-red tag sa ngalan ko sang una nga nagbutang sang ngalan ko sa mga tarpaulin sa mga flyovers, siya man ina gihapon. Indi ni ya ordinaryo nga pumuluyo nga maghimo sina. May kapasidad gid ina sila nga mag-red tag,” suno kay Asong.

Kumpiyansa si Asong nga nakahibalo man ang mga pumuluyo mga wala siya sang involvement sa NPA tungod adlaw-adlaw siya nga makita sa ila barangay.

Si Asong ang naka-agi nga nangin chairperson sang Katilingban sang Imol sa Siyudad (Kaisog) organization. “Nangin chairperson ako sang almost 15 years kag spokesperson. Nakatatak na ang amo na nga imahen sa paminsaron sang mga tawo.”

Wala na sang atrasanay suno kay Asong ang iya pagpadalagan bisan nga gina-red tag ukon gina-angut siya sa NPA. —via Aksyon Hotline